ہماری فوج بہترین، دشمن کا مقابلہ کرنے کی بھرپور صلاحیت رکھتی ہے: گورنر پنجاب

06-18-2025

(لاہور نیوز) گورنر پنجاب سردار سلیم حیدر کا کہنا ہے کہ ایران اور اسرائیل کے درمیان جنگ جتنی لمبی ہوگی اتنا ہی زیادہ نقصان ہوگا، ہمارے پاس دنیا کی بہترین فوج ہے جو دشمن کا مقابلہ کرنے کی بھرپور صلاحیت رکھتی ہے۔

گورنر پنجاب سردار سلیم حیدر سے ہائی کورٹ رپورٹرز ایسوسی ایشن کے وفد نے ملاقات کی۔ سردار سلیم حیدر خان نے وفد سے گفتگو کرتے ہوئے کہا کہ اقوام متحدہ اور سلامتی کونسل سمیت دیگر ممالک کو دونوں فریقین کے درمیان کشیدگی کم کرنے کے لئے کردار ادا کرنا ہوگا، پاکستان ایک پر امن ملک ہے اور خطے میں امن اور سلامتی چاہتا ہے۔ گورنر پنجاب نے کہا کہ وکلاء برادری کا ملک میں جمہوریت اور انصاف کی فراہمی میں کلیدی کردار ہے، 26ویں آئینی ترمیم سے جوڈیشری کے معاملات بہتر ہوئے ہیں تاہم بہتری کی گنجائش ہمیشہ رہتی ہے، ملک اور قوم کے مفاد میں اگر مزید آئینی ترامیم کی ضرورت ہو تو وہ بھی ہونی چاہئیں ۔  انہوں نے مزید کہا کہ ملک کو ترقی کی راہ پر گامزن کرنے کے لئے قانون کی حکمرانی اور عدل و انصاف کی فراہمی ضروری ہے، پیپلز پارٹی جمہوریت پر یقین رکھتی ہے اور اسے پروان چڑھتا دیکھنا چاہتی ہے،ملک کی بہتری کے لئے تمام سیاسی جماعتیں ایک پیج پر ہیں، مسلم لیگ ن کے ساتھ اتحاد ملک کے استحکام کے لیے کیا۔