ماڈل ٹاؤن کے شہدا کی 11ویں برسی، شہدا انصاف کے منتظر ہیں، خرم نواز

06-17-2025

(لاہور نیوز) منہاج القرآن سیکرٹریٹ میں شہدا ماڈل ٹاؤن کی 11ویں برسی منائی گئی، آج پاکستان عوامی تحریک کے رہنماؤں اور کارکنوں کی ماڈل ٹاؤن آمد جاری رہی، پاکستان عوامی تحریک کے رہنما خرم نواز گنڈاپور نے کہا کہ اپیل ہے کہ شہدا ماڈل ٹاؤن کو انصاف فراہم کیا جائے۔

رہنماؤں، کارکنوں نے یادگار شہدا پرحاضری دی اور فاتحہ خوانی کی، اس موقع پر سیکرٹری جنرل پاکستان عوامی تحریک خرم نواز گنڈاپور  نے دیگر قائدین کے ہمراہ پریس کانفرنس کی۔ خرم نواز گنڈاپور کا کہنا تھا کہ 17 جون 2014 سے 2025 تک 11سال ہو گئے ہیں، ماڈل ٹاؤن واقعہ کی انکوائری کے لئے جے آئی ٹی بنائی گئی تھی تاہم یہ شہدا کا کیس 5 سال سے پولیس حکام کی جانب سے دائر درخواست کے باعث حکم امتناعی پر چل رہا ہے۔ انہوں نے مزید کہا کہ جب تحقیقی ادارے کام نہیں کریں گے تو انصاف کا حصول کیسے ممکن ہو گا، ماڈل ٹاؤن کے شہدا اپنی قبروں میں انصاف کے منتظر ہیں، چیف جسٹس لاہور ہائیکورٹ سے اپیل ہے کہ شہدا ماڈل ٹاؤن کو انصاف فراہم کیا جائے۔