مہنگائی کا جن بے قابو، روزمرہ اشیا عوام کی پہنچ سے دور

06-16-2025

(لاہور نیوز) ملک بھر میں مہنگائی کی لہر نے عوام کو شدید پریشانی میں مبتلا کر دیا، روزمرہ استعمال کی اشیا کی قیمتیں مسلسل بڑھ رہی ہیں۔

برائلر گوشت کی قیمت میں 22 روپے فی کلو اضافہ ہوا ہے، جس کے بعد نئی قیمت 403 روپے فی کلو تک جا پہنچی ہے، فارمی انڈے فی درجن 287 روپے کی سطح پر برقرار ہیں، جبکہ ہول سیل مارکیٹ میں انڈوں کی پیٹی 8,490 روپے میں دستیاب ہے۔ ادھر سبزیوں اور پھلوں کی قیمتیں بھی آسمان سے باتیں کر رہی ہیں، مارکیٹ میں ٹینڈے 220 روپے، میتھی 160 روپے اور آلو 100 روپے فی کلو فروخت ہو رہے ہیں، پھلوں میں سیب 580 روپے، آڑو 320 روپے، جبکہ سندھڑی آم 300 روپے فی کلو میں دستیاب ہیں۔ شہریوں کا کہنا ہے کہ مہنگائی کی موجودہ صورتِ حال  نے روزمرہ زندگی کو بری طرح متاثر کیا ہے، حکومت سے مطالبہ کیا جا رہا ہے کہ فوری طور پر قیمتوں میں کمی اور مؤثر کنٹرول کے لئے اقدامات کئے جائیں۔