ٹریفک قوانین کی خلاف ورزی پر جرمانہ 10 گنا تک بڑھانے کا اصولی فیصلہ

05-27-2025

(لاہور نیوز) ٹریفک قوانین کی خلاف ورزی پر جرمانہ 10 گنا تک بڑھانے کا اصولی فیصلہ کر لیا گیا۔

وزیراعلیٰ پنجاب مریم نواز شریف کی زیر صدارت خصوصی اجلاس منعقد ہوا۔ اجلاس میں ٹریفک قوانین کی خلاف ورزی پر جرمانہ 10- گنا تک بڑھانے کا اصولی فیصلہ کیا گیا ہے۔ کم عمر بچوں کی ڈرائیونگ پر والد کو ذمہ دار قرار دیا جائے گا، مقدمہ بھی درج ہوگا۔ گاڑی سے باہر خطرناک انداز سے لٹکتے سریا وغیرہ پر گاڑی بند کردی جائے گی۔ ون ویلنگ یا خطرناک طرز ڈرائیونگ پر مقدمہ درج ہوگا۔ وزیراعلیٰ نے بیدیاں اور دیگر روڈز پر ٹریفک کی روانی میں رکاوٹیں فوری دور کرنے کا حکم دیا ہے۔ اجلاس میں پنجاب کے 372 اور لاہور کے 77 پوائنٹس کی ری ماڈلنگ پر غور کیا گیا۔ وزیراعلیٰ نے ٹریفک چالان کے ساتھ ویڈیو اور تصویری ثبوت منسلک کرنے کی ہدایت کی اور ٹریفک جام کی پیشگی نشاندہی کے لئے روڈ سائیڈ ڈیجیٹل سکرین لگانے کا حکم دیا ہے۔ اجلاس میں دوران ڈرائیونگ موبائل فون کے استعمال پر بھاری جرمانہ عائد کرنے اور بڑے روڈز کے اطراف میں سامان سے لدی ٹرالیاں کھڑی کرنے پر پابندی لگانے پر اتفاق کیا گیا ہے۔ خراب یا بند ہیڈ لائٹسں کے ساتھ ڈرائیونگ پر سخت کارروائی ہوگی۔ ٹریفک پولیس کی یونیفارم تبدیل کرنے کی تجویز کا جائزہ اور ٹریفک پولیس کی پانچ کیٹگری بنانے کا اصولی فیصلہ کیا گیا ہے۔ انفورسمنٹ آفیسر، ٹریفک ریگولیٹر، ایجوکیشن لائسنسنگ اور پبلک سروس آفیسر کی کیٹگری بنائی جائے گی۔ شفافیت کے لئے ٹریفک وارڈن ان کیمرہ ٹریفک چالان کریں گے۔ وزیراعلیٰ مریم نوازشریف نے ٹریفک پولیس کو جدید ترین پٹرول وہیکل اور جدید ترین آلات دینے کی منظوری دے دی۔ مریم نواز شریف نے اجلاس میں گفتگو کرتے ہوئے کہا کہ ٹریفک کے نظام میں بہتری نظر نہیں آرہی ہے، ٹھوس اور پائیدار اقدامات کرنے ہوں گے، ٹریفک حادثات کے وقوع پذیر ہونے سے پہلے موثر اقدامات ہی کامیابی ہے، خود نکل کر شہر کے مختلف سڑکوں پر ٹریفک کی صورتحال کا جائزہ لیتی ہوں۔