سب سبق حاصل کریں، سیاست آئین و قانون کے مطابق ہونی چاہیے: شاہد خاقان

05-02-2025

(ویب ڈیسک) سربراہ عوام پاکستان پارٹی شاہد خاقان عباسی نے کہا ہے کہ سب سبق حاصل کرلیں، سیاست آئین وقانون کےمطابق ہونی چاہیے۔

کوئٹہ میں پریس کانفرنس کرتے ہوئے شاہد خاقان عباسی کا کہنا تھا کہ تاریخ کا سبق بڑا تلخ ہے، دہرانا نہیں چاہیے، عوام کو بنیادی حقوق دینا ہوں گے، ملک کو آئین کے مطابق چلانا ہو گا ملک آئین کے بغیر نہیں چلتے۔ انہوں نے کہا کہ میاں نواز شریف کی جماعت اقتدار میں ہے جو کچھ ہو رہا ہے اس کے براہ راست ذمہ داری میاں نواز شریف پر ہی عائد ہوتی ہے، بلوچستان کےمسائل کا ایک ہی حل ہے کہ ملک کے نظام کو آئین کے مطابق چلایا جائے۔ سربراہ عوام پاکستان پارٹی کا مزید کہنا تھا کہ میں کبھی کسی غیر آئینی عمل کا حصہ نہیں رہا،  2018 کے بعد ملک کے حالات خراب ہوئے، وقت ہے آج بھی سب سبق حاصل کر لیں، سیاست آئین و قانون کے مطابق ہونی چاہیے۔