سرکاری ہسپتالوں کی نجکاری، گرینڈ ہیلتھ الائنس پنجاب کا دھرنا جاری

04-28-2025

(لاہور نیوز) سرکاری ہسپتالوں کی نجکاری کے معاملے پر گرینڈ ہیلتھ الائنس پنجاب کا دھرنا 22 ویں روز بھی جاری ہے۔

نرسز، پیرا میڈیکس اور ینگ ڈاکٹرز  نے ہسپتالوں کو آؤٹ سورس نہ کرنے کا مطالبہ کر رکھا ہے، پنجاب بھر سے مظاہرین  نے چیئرنگ کراس پر ڈیرے جمائے ہوئے ہیں، مظاہرین کا کہنا ہے کہ مطالبات کی منظوری تک دھرنا جاری رکھیں گے۔ مظاہرین  نے وزیراعلیٰ ہاؤس کا گھیراؤ کرنے کا اعلان کر دیا، پولیس بھی مظاہرین سے نمٹنے کیلئے تیار ہے، چیئرنگ کراس سے وزیراعلیٰ ہاؤس جانے والا راستہ بند کر دیا گیا، خاردار تاریں اور واٹر کینن بھی راستے پر کھڑی کر دی گئی، مظاہرین کو روکنے کیلئے پولیس کی بھاری نفری مال روڈ پر موجود ہے۔ دھرنے کے باعث شہر کی ٹریفک درہم برہم ہو گئی، مال روڈ بند ہونے سے دیگر شاہراہوں پر ٹریفک کا لوڈ بڑھ گیا اور منٹوں کا سفر گھنٹوں میں طے ہونے لگا۔ لاہور پریس کلب کے گردو نواح میں ٹریفک کا شدید دباؤ ہے، کینال روڈ سے مال روڈ پر جانے والا راستہ بند ہے، ریگل چوک سے پی سی ہوٹل جانے والا راستہ بھی بند ہے، بیڈن روڈ، ایوان تجارت، شملہ پہاڑی اور ملحقہ علاقوں میں ٹریفک جام ہے، ڈیوس روڈ پر ایمبولینس شدید ٹریفک میں پھنس گئی۔