چیئرمین نیب لیفٹیننٹ جنرل (ر) نذیراحمد کا لاہور بیورو کا دورہ، بریفنگ میں شرکت

04-26-2025

(لاہور نیوز) چیئرمین نیب لیفٹیننٹ جنرل (ر) نذیر احمد کا نیب لاہور بیورو کا دورہ ،ڈی جی نیب لاہور احترام ڈار نے میگا سکینڈلز میں ہونے والی پیشرفت پر جامع بریفنگ دی۔

ترجمان نیب لاہور بیورو  کے مطابق بریفنگ میں ڈی جی آپریشنز نیب امجد مجید اولکھ اور نیب لاہور کی انویسٹی گیشن ٹیموں نے شرکت کی۔ چیئرمین نیب لیفٹیننٹ جنرل (ر) نذیر احمد نے خطاب کرتے ہوئے کہا کہ نیب کی مجموعی کارکردگی میں نیب لاہور کا اہم کردار ہے، نیب نے اپنے قیام سے 2022ء تک 790 ارب کی ریکوری کروائی، ہم نے پچھلے دو سالوں میں 5.4 ٹریلین کی ریکارڈ ریکوری ممکن بنائی، نیب کے حالیہ اقدامات پرعدلیہ کی نیب کے حوالے سے رائے تبدیل ہوئی ہے۔  چیئرمین نیب کا کہنا تھا کہ نیب میں پالیسی ریفارمز پر بیوروکریسی نے اعتماد کا اظہار کیا ہے، کسی خوف کے باعث فائلیں رکنے کا سلسلہ ختم ہوچکا ہے، نیب میں پیپر فری کلچر کو فروغ دیا جا رہا ہے۔ ترجمان نیب لاہور کے مطابق چیئرمین نیب نے اسٹیٹ لائف کوآپریٹو سوسائٹی کے لیک ویو میڈوز سے الحاق پر بریفنگ اور جائزہ کیلئے سائٹ کا دورہ کیا۔ نیب لاہور کی نگرانی میں اسٹیٹ لائف فیز 2 کے 7650 متاثرین کو 77 ارب مالیت کے ڈویلپڈ پلاٹ دلوائے جائیں گے، چیئرمین نیب نے اسٹیٹ لائف میڈوز کے دورہ کے دوران حکام سے پیش رفت پر بریفنگ لی۔ چیئرمین نیب نے اس موقع پر کہا کہ اسٹیٹ لائف سکینڈل کے ہزاروں متاثرین کو جلد از جلد ریلیف دینا نیب کی اولین ترجیح ہے ، نیب لاہور کو مذکورہ سوسائٹی کی متعلقہ اداروں سے منظوری اور ڈویلپمنٹ کی تکمیل تک نگرانی کا حکم جاری کیا ہے، کم سے کم وقت میں زیادہ سے زیادہ کام کرنے کا عہد کر رکھا ہے۔ چیئرمین نیب نے ساڑھے تین کروڑ مالیت کا چیک بھی حکومت پنجاب کے حوالے کیا۔چیئرمین نیب کی جانب سے ڈی جی نیب لاہور احترام ڈار کی نگرانی میں نیب لاہور بیورو کی کارکردگی کو سراہا گیا۔