پنجاب فوڈ اتھارٹی کی کارروائی، 2 بیکری پاپڑ یونٹس کی پروڈکشن بند، جرمانہ عائد

04-19-2025

(لاہور نیوز) پنجاب فوڈ اتھارٹی کی ٹیم نے کارروائی کرتے ہوئے 2 بیکری پاپڑ یونٹس کی پروڈکشن بند کر دی۔

 صحت دشمن عناصر کیخلاف پنجاب فوڈ اتھارٹی متحرک ہے، ڈی جی فوڈ اتھارٹی کے حکم پر ڈائریکٹر آپریشنز  نے رائیونڈ میں گرینڈ آپریشن کیا، فوڈ سیفٹی ٹیموں  نے کارروائی کرتے ہوئے 6 ہزار کلو ناقص پاپڑ، 2500 کلو مضر صحت نمکو، 200 لٹر فلیور، 350 کلو پیٹیز اور رنگ تلف کر دیا۔ ڈی جی فوڈ اتھارٹی عاصم جاوید نے بتایا کہ ناقص انتظامات اور قوانین کی خلاف ورزیوں پر کارروائی کی گئی، ناقص فلیور سے بیکری کنفیکشنری اشیاء تیار کی جا رہی تھیں، مضر صحت رنگ لگا کر بچوں کے پسندیدہ پاپڑ تیار کئے گئے تھے، یونٹ میں موجود ملازمین کے میڈیکل اور ٹریننگ سرٹیفکیٹس عدم موجود پائے گئے۔ ڈی جی فوڈ اتھارٹی نے بتایا کہ کارروائی کے دوران پروسیسنگ ایریا میں بدبودار ماحول، دیواروں پر جالے، ٹوٹے فرش پائے گئے، گندے سٹوریج ایریا میں تیار اور خام مال موجود پایا گیا، یونٹس سے خام اور تیار مال برآمد کر کے تلف کر دیا گیا۔ ان کا کہنا تھا بچوں کی صحت کیساتھ کھلواڑ کرنے والے عناصر کسی رعایت کے مستحق نہیں ہیں، پنجاب میں خوراک کا کاروبار کرنے کے لئے متعین کردہ قوانین پر عملدرآمد لازم ہے، شہری پنجاب فوڈ اتھارٹی سے منظور شدہ اشیاء استعمال کریں، شکایت کی صورت میں 1223 پر اطلاع دیں۔