ڈرگ کورٹس کو نئے انداز سے تشکیل دینے کا فیصلہ

04-17-2025

(ویب ڈیسک) پنجاب حکومت نے صوبے میں ڈرگز مافیا کے خلاف مؤثر کارروائی کو یقینی بنانے کیلئے ڈرگ کورٹس کی ازسرِنو تشکیل کا فیصلہ کر لیا۔

بل کے متن کے مطابق ڈرگ کورٹس میں ایک سیشن جج اور دو ماہرین پر مشتمل ایک نیا ٹربیونل قائم کیا جائے گا۔ سیشن جج کو لاہور ہائیکورٹ کے چیف جسٹس کی جانب سے 3 سال کیلئے نامزد کیا جائے گا جبکہ دو ماہرین، جنہیں پندرہ سالہ تجربہ حاصل ہو اُنہیں پنجاب حکومت تین سال کیلئے منتخب کرے گی۔ بل کے مطابق کسی بھی مقدمے میں حتمی فیصلہ تینوں ارکان کی موجودگی میں ہی ممکن ہو گا، اس ترمیم کا مقصد ڈرگ کورٹس کو ماحولیاتی اور لیبر کورٹس کی طرز پر مضبوط اور فعال بنانا ہے تاکہ منشیات کے مقدمات میں شفاف اور بروقت فیصلے ممکن بنائے جا سکیں۔