گاڑی میں بیٹھ کر پیپر حل کرنے والا امیدوار گرفتار

04-17-2025

(لاہور نیوز) طالبعلم کو نہم جماعت کا فزکس کا پرچہ گاڑی میں بیٹھ کر حل کرتے ہوئے رنگے ہاتھوں پکڑ لیا گیا۔

تفصیلات کے مطابق صوبائی وزیر تعلیم رانا سکندر حیات نے اچانک گورنمنٹ ہائی سکول علی رضا آباد پر چھاپہ مارا جہاں طالبعلم سید محمد ابوبکر ہاشمی اپنی گاڑی میں بیٹھ کر پرچہ حل کر رہا تھا۔ اس موقع پر کنٹرولر امتحانات زاہد میاں بھی وزیر تعلیم کے ہمراہ موجود تھے۔ کنٹرولر زاہد میاں  نے انکشاف کیا کہ مذکورہ طالبعلم اپنے تمام پرچے گاڑی میں بیٹھ کر ہی حل کرتا رہا ہے۔ واقعے کے بعد ہیڈ ماسٹر محمد شاہد بیگ، سپرنٹنڈنٹ عبدالحفیظ سمیت 5 اہلکاروں کو معطل کر دیا گیا جبکہ ڈپٹی سپرنٹنڈنٹ اور دو نگرانوں کو بھی معطلی کی زد میں لایا گیا ہے۔ تمام ملوث افراد کے خلاف مقدمہ درج کر کے انکوائری کا آغاز کر دیا گیا۔