سی ٹی ڈی پنجاب کے مختلف شہروں میں آپریشنز، 10 دہشتگرد گرفتار

04-14-2025

(لاہور نیوز) سی ٹی ڈی پنجاب نے مختلف شہروں میں آپریشنز کرتے ہوئے 10 دہشت گرد گرفتار کر لئے۔

 ترجمان سی ٹی ڈی کے مطابق دہشت گردی کے خدشات کے پیش نظر سی ٹی ڈی نے پنجاب کے مختلف شہروں میں 189 آئی بی اوز آپریشنز کئے، کارروائیاں لاہور، بہاولپور، راولپنڈی، گوجرانوالہ اور جہلم میں کیں، راولپنڈی سے 2 خطرناک دہشت گرد بادل سنگھ اور سورج سنگھ گرفتار کر لئے گئے، دونوں کا تعلق ننکانہ صاحب سے ہے۔ دہشت گردوں سے دھماکا خیز مواد ، 16 ڈیٹونیٹرز، حفاظتی فیوز تار، پمفلٹ اور دیگر اشیا برآمد کر لی گئیں۔ ترجمان سی ٹی ڈی نے بتایا گرفتار دہشت گردوں کی شناخت بادل سنگھ، سورج سنگھ ، سراج ، ہدایت اللہ ، دیدار حسین ، صداقت حسین، سلیمان خان ، زید وغیرہ کے نام سے ہوئی، دہشت گرد مختلف مقامات پر کارروائی کر کے عوام میں خوف و ہراس پھیلانا چاہتے تھے۔ رواں ہفتے میں 2053 کومبنگ آپریشنز کے دوران 263 مشتبہ افراد گرفتار کئے گئے، کومبنگ آپریشنز میں 82473 افراد سے پوچھ گچھ کی گئی۔