بانی پی ٹی آئی کو جیل میں بنیادی حق تک نہیں دیئے جا رہے: شیخ وقاص اکرم

04-07-2025

(ویب ڈیسک) مرکزی سیکرٹری اطلاعات پی ٹی آئی شیخ وقاص اکرم نے کہا کہ بانی پی ٹی آئی کو جیل میں بنیادی حق تک نہیں دیئے جا رہے جبکہ وکلاء کی ملاقات بھی نہیں کرائی جا رہی۔

شیخ وقاص اکرم کا کہنا تھا کہ منگل کو بانی سے وکلاء اور گھر والوں کی ملاقات طے ہے، انہیں ملاقات کرنے دی جائے۔ مرکزی سیکرٹری اطلاعات نے کہا کہ حکومت کی کسان دشمن پالیسی پر پی ٹی آئی کا مؤقف واضح ہے، پاکستان جیسے زرعی ملک میں کسان کے ساتھ دشمنی ملک کےساتھ دشمنی ہے۔ شیخ وقاص اکرم  کا کہنا تھا کہ 2022 کے سیلاب کے بعد گندم کی کمی کو پورا کرنے کیلئے گندم کی امپورٹ کی گئی، پبلک اکاؤنٹس کمیٹی کے چیئرمین سے درخواست ہے کہ وہ اس گندم سکینڈل کو اٹھائیں۔ سیکرٹری اطلاعات پی ٹی آئی  نے مزید کہا کہ گندم کی امدادی قیمت کی پالیسی آئی ایم ایف کی شرط پر ختم کر دی گئی ملک میں بہت بڑا بحران آنے والا ہے، پاکستان میں کسانوں کو سہولت کیا دی گئی ان پر اب ٹیکسز بھی لگائے جا رہے ہیں۔