ملک بھر میں عیدالفطر مذہبی عقیدت و احترام کے ساتھ منائی جا رہی ہے

03-31-2025

(لاہور نیوز) ملک بھر میں عیدالفطر مذہبی عقیدت و احترام کے ساتھ منائی جا رہی ہے۔

لاہور، اسلام آباد، کراچی، کوئٹہ اور پشاور سمیت ملک کے مختلف شہروں اور قصبوں میں بڑے اور چھوٹے عیدالفطر کے ہزاروں اجتماعات منعقد ہوئے جہاں فرزندان اسلام  نے نماز عید ادا کی۔ ماڈل ٹاؤن میں نماز عید کے مرکزی اجتماع کی امامت قاری محمد معین نے کی، چیئرمین دنیا میڈیا گروپ میاں عامر محمود ، میاں حمزہ محمود ، صدر ماڈل ٹاؤن سوسائٹی صاحبزادہ سیف الرحمنٰ نے شرکت کی۔ سابق امیر جماعت اسلامی لیاقت بلوچ  نے منصورہ میں نماز عید ادا کی، جامعہ نعیمیہ میں علامہ راغب حسین نعیمی  نے نماز عید کی امامت کرائی، گریٹر اقبال پارک میں عوام کے جم غفیر  نے شرکت کی، علامہ ابتسام الٰہی ظہیر  نے امامت کرائی۔ نماز عید کی ادائیگی کے بعد امت مسلمہ، ملکی سلامتی اور امن کے لئے خصوصی دعائیں کی گئیں، مسلمانوں نے گلے شکوے بھلا کر گلے مل کر ایک دوسرے کو عید کی مبارکباد دی۔ دنیا میڈیا گروپ کی جانب سے اہل وطن کو عیدالفطر کی ڈھیروں خوشیاں مبارک ہوں۔