پنجاب اسمبلی میں مسودہ قانون ترمیم نوٹریز 2025ء کثرت رائے سے منظور

03-14-2025

(لاہور نیوز) پنجاب اسمبلی میں حکومت نے مسودہ قانون ترمیم نوٹریز 2025ء کثرت رائے سے منظور کر لیا۔

اپوزیشن اراکین کی ترامیم کے معاملہ پر مجتبیٰ شجاع الرحمان غصہ میں آگئے، اپوزیشن کو جوکر قرار دیدیا، اپوزیشن ارکان اپنی سیٹوں پر کھڑے ہو گئے اور وزیر پارلیمانی امور مجتبیٰ شجاع الرحمان کے جواب پر اعتراض کر دیا۔ مجتبیٰ شجاع الرحمان  نے اپنی گفتگو میں کہا کہ اپوزیشن ترامیم میں کوئی کام کی بات نہیں ہوتی، اپوزیشن پوری تیاری کے ساتھ ایوان میں آتی ہے، ڈپٹی سپیکر کا کہنا تھا کہ مجتبیٰ شجاع الرحمن آپ ایسی بات نہ کریں۔ مجتبیٰ شجاع الرحمان  نے جواب میں کہا کہ میں اپوزیشن کا پابند نہیں ہوں یہ سمجھتے ہیں ہر چیز بلڈوز کر کے کام کر لیں گے تو یہ کوئی طریقہ نہیں ہے۔ ڈپٹی سپیکر ظہیر اقبال چنڑ  نے کہا کہ آپ حکومت ہیں آپ کو دل بڑا کرنا ہو گا، اگر حکومت کی جانب سے دل آزاری ہوئی تو معافی مانگتا ہوں، بعدازاں وزیر پارلیمانی امور کے الفاظ حذف کر دیئے گئے۔ ڈپٹی سپیکر کا مزید کہنا تھا کہ جب انسان طاقت میں ہوتا ہے تو زعم آہی جاتا ہے، مجتبی شجاع الرحمان کو الفاظ واپس لینے چاہیے تھے۔