سپیشل اولمپکس ورلڈ ونٹر گیمز، پاکستان کا 25 رکنی دستہ اٹلی پہنچ گیا

03-05-2025

(لاہور نیوز) سپیشل اولمپکس پاکستان کا 25 رکنی دستہ 8 مارچ سےاٹلی کے شہر ٹیورن میں شروع ہونے والے سپیشل اولمپکس ورلڈ ونٹر گیمز 2025 میں شرکت کرے گا۔

15 مارچ تک جاری رہنے والے گیمز کے لیے قومی دستہ میں کھلاڑی، کوچز، آفیشلز، طبی عملہ اور نوجوان رہنما شامل ہوں گے، پاکستان کے کھلاڑی سنو شوئنگ اور کراس کنٹری اسکیئنگ کے مقابلوں میں حصہ لیں گے۔ ونٹر گیمز میں 93 سے زائد ممالک کے 15 سو سے زائد مرد اور خواتین ایتھلیٹس شرکت کریں گے جبکہ 2 ہزار کے لگ بھگ رضا کار ان کی معاونت کریں گے، مزید برآں چھ پاکستانی مندوبین گلوبل یوتھ لیڈرشپ سمٹ میں شرکت کرکے کھیلوں کے ذریعے شمولیت اور بااختیار بنانے کی وکالت کریں گے۔ سپیشل اولمپکس ورلڈ ونٹر گیمز 2025 میں پاکستان کے 10 ایتھلیٹس میں 5 مرد اور 5 خواتین شامل ہوں گے جبکہ 2 مرد اور 2 خواتین کوچز ان کی رہنمائی کریں گے،2 خواتین سمیت 3 آفیشلز،1 مرد اور 1 خاتون ڈاکٹر، 2 ایڈیشنل آفیشلز بھی دستہ کا حصہ ہوں گے جبکہ خواتین پر مشتمل 6 رکنی وفد گلوبل یوتھ لیڈر شپ سمت میں شریک ہوگا۔ وفد میں کراچی، راولپنڈی، لاہور، فیصل آباد، اسلام آباد، صوابی اور گلگت کے شرکاء شامل ہیں جو پاکستان کی اسپیشل اولمپکس کمیونٹی کی متنوع نمائندگی کی عکاسی کرتے ہیں۔