والد سے دو کروڑ ہتھیانے کیلئے اپنے اغوا کا ڈراما رچانے والا نوجوان دوست سمیت گرفتار

03-05-2025

(لاہور نیوز) صوبائی دارالحکومت میں نوجوان کے اغوا کا ڈراپ سین ہوگیا، نوجوان نے دوست کے ساتھ مل کر اپنے اغوا کا ڈراما رچا کر گھر والوں سے دو کروڑ روپے ہتھیانے کا منصوبہ بنایا تھا، پولیس نے 12 گھنٹے میں ملزمان کو گرفتار کرلیا۔

ڈی آئی جی آپریشنز  فیصل کامران کے مطابق  پولیس کو عبدالرحمان نامی شہری کی جانب سے بیٹے کے اغوا کی درخواست موصول ہوئی جس پر نوٹس لیتے ہوئے مغوی کی بازیابی کیلئے خصوصی ٹیم تشکیل دی گئی۔  پولیس نے مقدمہ درج کرکے ملزمان کی تلاش شروع کردی اورخصوصی ٹیم نے چند ہی گھنٹوں میں ملزمان کو گرفتار کر لیا ، درخواست گزار کے بیٹے کو اغوا کرنے والا کوئی اور نہیں بلکہ اس کا بیٹا خود ہی تھا جس نے دوست کے ساتھ مل کر گھر والوں سے دو کروڑ کی رقم ہتھیانے کا منصوبہ بنایا تھا۔   ڈی آئی جی آپریشنز کے مطابق گھر والوں سے مغوی کی بازیابی کیلئے دو کروڑ روپے کی ڈیمانڈ کی گئی تھی، تاہم پولیس نے جدید ٹیکنالوجی کو بروئے کار لاتے ہوئے ملزمان کو گرفتار کرلیا۔  ڈی آئی جی فیصل کامران کے مطابق شہری کے بیٹے اور اس کے دوست  کو گرفتار کرکے انویسٹی گیشن پولیس کے حوالے کر دیا گیا ہے۔