ساڑھے دس کروڑ پاکستانی خط غربت سے نیچے جا چکے ہیں: مفتاح اسماعیل

03-03-2025

(لاہور نیوز) سیکرٹری جنرل عوام پاکستان پارٹی و سابق وزیر خزانہ مفتاح اسماعیل نے کہا ہے کہ ساڑھے دس کروڑ پاکستانی خط غربت سے نیچے ہے۔

دنیا نیوز کے پروگرام’’دنیا مہر بخاری کے ساتھ‘‘میں گفتگو کرتے ہوئے مفتاح اسماعیل کا کہنا تھا کہ گزشتہ تین سالوں سے پاکستانی غریب ہوتے جا رہے ہیں، اشیاء مہنگی جبکہ تنخواہیں نہیں بڑھ رہی ہیں۔ انہوں نے دعویٰ کیا کہ ملک میں دس کروڑ پچاس لاکھ پاکستانی خط غربت سے نیچے ہیں، پتہ نہیں یہ کس بات کی خوشی منانےکی بات کر رہے ہیں، ہم چاہتے ہیں آئی ایم ایف پروگرام چلتا رہے، حکومت نے اصلاحات بارے کچھ نہیں کیا۔ سربراہ عوام پاکستان پارٹی کا کہنا تھا کہ تنخواہ دار طبقے پر ٹیکسوں کا بوجھ ڈالا ہوا ہے، حکومت نے ہر چیز پر ٹیکس بڑھا دیا ہے، حکومت کو اپنے اخراجات کم کرنے چاہئیں تاہم تعلیم کے نظام کو بھی بہتر کرنا ہو گا۔