نومئی مقدمات: شاہ محمود سمیت پی ٹی آئی رہنماؤں اور کارکنوں پرترمیمی فرد جرم عائد

03-03-2025

(لاہور نیوز) انسداد دہشت گردی عدالت نے نو مئی جناح ہاؤس کے قریب پولیس کی گاڑیاں جلانے کے تین مقدمات میں شاہ محمود قریشی سمیت پی ٹی آئی رہنماؤں اور کارکنوں پر ترمیمی فرد جرم عائد کر دی۔

انسداد دہشتگردی عدالت کے جج منظر علی گل نے کوٹ لکھپت جیل میں مقدمے کی سماعت کی، ملزموں  نے ترمیمی فرد جرم کی صحت جرم سے انکار کیا۔ عدالت نے تینوں مقدمات میں ملزموں پر ترمیمی فرد جرم عائد کی، شاہ محمود قریشی سمیت دیگر پر دوبارہ فرد جرم عائد کی گئی ہے، دوران سماعت شاہ محمود قریشی، سابق گورنر پنجاب عمر سرفراز چیمہ اور ڈاکٹر یاسمین راشد سمیت دیگر زیر حراست ملزموں کی حاضری مکمل کی گئی۔ عدالت میں عالیہ حمزہ، صنم جاوید اور خدیجہ شاہ سمیت دیگر ملزم پیش ہوئے، عدالت نے 6 مارچ کو گواہوں کو بیان ریکارڈ کرانے کیلئے طلب کر لیا، دوسری جانب پراسیکویشن  نے تمام دفعات کے مطابق فرد جرم میں ترمیم کی استدعا کر رکھی تھی، جس پر عدالت نے پراسکیوشن کو فرد جرم میں ترمیم کی اجازت دی تھی۔ واضح رہے پی ٹی آئی رہنماؤں اور کارکنوں پر بغاوت اور کارکنان کو فسادات پر اُکسانے کے الزام پر سنگین دفعات کے تحت مقدمات درج ہیں۔