لاہور: بھکاری گروہ کا سرغنہ گرفتار

03-02-2025

(لاہور نیوز) سٹی ٹریفک پولیس لاہور نے ٹھوکر کے علاقہ سے بھکاری گروہ کا سرغنہ گرفتار کر لیا۔

رمضان المبارک کے دوران سٹی ٹریفک پولیس لاہور  نے پیشہ ور بھکاریوں کے خلاف ایکشن لیتے ہوئے ٹھوکر کے علاقہ سے بھکاری گینگ چلانے والے سرغنہ کو گرفتار کر کے اس کیخلاف مقدمہ درج کر کے حوالات میں بند کر دیا۔ انچارج سیکٹر نیاز بیگ انسپکٹر زاہد نے ٹریفک وارڈنز امجد اور ارشد کے ہمراہ مسلسل 2 سے 3 دن کی کاوش سے بھکاری گینگ کا پتہ چلایا، گروہ کا سرغنہ اپنی گھر کی خواتین سمیت دیگر عورتوں سے بھیک منگواتا تھا اور خود سائیڈ پر بیٹھ کر نگرانی کرتا تھا، دورانِ تفتیش  گروہ کے سرغنہ احمد ولد انگن  نے پولیس کو بتایا کہ وہ شکار پور سندھ کا رہائشی ہے اور وہاں سے خواتین کو لاہور لا کر بھیک منگواتا ہے، ملزم  نے مزید بتایا کہ ہمارا پورا گروہ ہے جن کو شہر کے مختلف پوائنٹس پر بھیک مانگنے کے لئے چھوڑا جاتا ہے۔ بھکاری گروہ کے سرغنہ احمد ولد انگن کے خلاف گداگری ایکٹ کے تحت کارروائی کرتے ہوئے تھانہ مصطفی ٹاون میں مقدمہ درج کروایا گیا، سی ٹی او لاہور کا کہنا ہے کہ شہر کو پیشہ ور بھکاریوں سے پاک کریں گے، رمضان میں خصوصی ٹیموں کے ذریعہ بھکاریوں کے خلاف کریک ڈاون جاری رہے گا، سی ٹی او کی جانب سے ٹریفک وارڈنز کو بہترین کارکردگی پر تعریفی اسناد اور نقد انعام دینے کا اعلان بھی کیا گیا۔