شہریوں کو دھوکہ باز عناصر سے خبردار کرنے کیلئے آگاہی مہم شروع

03-01-2025

(ویب ڈیسک) محکمہ داخلہ پنجاب نے شہریوں کو دھوکہ باز عناصر سے خبردار کرنے کیلئے آگاہی مہم شروع کر دی۔

محکمہ داخلہ پنجاب نے سوشل میڈیا کے ذریعے فراڈ سے بچاؤ کیلئے اہم ہدایات جاری کیں، جس میں کہا گیا ہے کہ شہری سوشل میڈیا اور تمام ڈیجیٹل پلیٹ فارمز ذمہ داری سے استعمال کریں ، واٹس ایپ ودیگر سوشل میڈیا پلیٹ فارمز پر انجان لوگوں سے معلومات ہرگز شیئر نہ کریں۔ محکمہ داخلہ  نے کہا ہے کہ شہری انجانے نمبرز سے آنے والی کالز اور پیغامات پر کوئی رقم یا کوڈ نہ بھجوائیں، نان کسٹم پیڈ اشیاء کی خریداری کیلئے کوڈ اور اکاؤنٹ نمبر کسی سے شیئر نہ کریں، کسی عزیز کے اغواء کی جھوٹی کال پر کوئی رقم نہ بھیجیں۔ شہریوں کو مزید ہدایت یہ کی گئی ہے کہ کسی انجان شخص کو اپنی دفتری، ذاتی یا خاندانی معلومات ہرگز نہ دیں، شہری انٹرنیٹ پر کوئی بھی مشکوک یا انجان لنک کھولنے سے گریز کریں۔