دہشتگردی کے خدشات، سی ٹی ڈی کے صوبہ پنجاب میں آپریشنز، 20 دہشت گرد گرفتار

03-01-2025

(لاہور نیوز) دہشتگردی کے خدشات کے پیش نظر سی ٹی ڈی نے پنجاب کے مختلف شہروں میں 162 آئی بی اوز آپریشن کئے۔

ترجمان سی ٹی ڈی کے مطابق انٹیلی جنس بیسڈ آپریشنز لاہور، فیصل آباد، خانیوال، بہاول نگر، راولپنڈی، میانوالی، ساہیوال، شیخوپورہ ، سیالکوٹ، بہاولپور اور حافظ آباد میں کئے گئے، اس دوران 20 دہشت گرد گرفتار ہوئے، لاہور سے فتنہ الخوارج کے 2 جبکہ راولپنڈی سے خطرناک دہشت گرد منموہن سنگھ گرفتار کیا گیا۔  ترجمان نے بتایا منموہن سنگھ کا تعلق رحیم یار خان سے ہے، دہشتگردوں سے دھماکہ خیز مواد، 3 آئی ای ڈی بم ، 23 ڈیٹونیٹر، 61 فٹ حفاظتی فیوز تار، موبائل فون برآمد ہوا، دہشتگردوں کی شناخت محمد ریاض ، ابوبکر ، بوال خان، محمد یونس ، منموہن سنگھ وغیرہ کے نام سے ہوئی۔ ترجمان کا مزید کہنا تھا رواں ہفتے میں 2231 کومبنگ آپریشنز کے دوران 495 مشتبہ افراد گرفتار کئے، کومبنگ آپریشنز میں 87565 افراد سے پوچھ گچھ کی گئی۔