پنجاب یونیورسٹی: پاکستان کے سب سے بڑے تین روزہ کتاب میلے کا انعقاد

02-21-2025

(لاہور نیوز) پاکستان کے سب سے بڑے تین روزہ کتاب میلے کی رونقیں پنجاب یونیورسٹی میں سج گئیں، کتاب میلے کے دوسرے روز 100 سے زائد سٹالز لگائے گئے۔

کتاب میلے میں سیاسی، سماجی، ادبی، دینی، سائنسی، تاریخی، معاشی اور بچوں کی کتابوں کے سٹالز بھی موجود ہیں،کتابوں کے شوقین افراد بڑی تعداد میں میلے کا رخ کر رہے ہیں، ان کا کہنا تھا کہ کتاب میلے میں کتابیں ڈسکاؤنٹ ریٹ پر فراہم کی جا رہی ہیں۔ علم و ادب کے متوالوں کے لیے یہ میلہ کسی نعمت سے کم نہیں جہاں ایک ہی چھت تلے مختلف موضوعات پر کتب باآسانی دستیاب ہیں، شہریوں کا کہنا تھا کہ کتاب میلے میں نایاب کتابیں سستی اور معیاری ریٹ پر فروخت کی جا رہی ہیں، یہاں پر سی ایس ایس اور پی ایم ایس کی کتابوں سمیت متعدد اقسام کی کتابیں موجود ہیں جو کہ ہمارے لیے بہت فائدہ مند ہیں۔ کتاب میلے کے دوسرے روز ملک بھر کے معروف پبلشرز  نے بھی کتاب میلے میں اپنی کتابیں قارئین کیلئے پیش کیں، کتاب میلہ صبح 9 بجے سے رات 8 بجے تک جاری رہے گا۔