چیمپئنز ٹرافی: جنوبی افریقہ نے افغانستان کو 316 رنز کا ہدف دے دیا

02-21-2025

(لاہور نیوز)آئی سی سی چیمپئنز ٹرافی کے تیسرے میچ میں جنوبی افریقہ نے افغانستان کو جیت کیلئے 316 رنز کا ہدف دے دیا۔

دونوں ٹیموں کے درمیان میچ کراچی کے نیشنل بینک سٹیڈیم میں کھیلا جا رہا ہے جہاں پروٹیز کو ٹیمبا باووما لیڈ کر رہے ہیں جبکہ افغان ٹیم کی کمان حشمت اللہ شاہدی کے سپرد ہے، یہ چیمپئنز ٹرافی کے گروپ بی کا پہلا میچ ہے۔ ٹاس کے موقع پر افغانستان کے کپتان حشمت اللہ شاہدی کا کہنا تھا کہ اگر ہم ٹاس جیتتے تو باؤلنگ ہی کرتے، ہم نے شارجہ میں جنوبی افریقہ کے خلاف معیاری کرکٹ کھیلی، ہمارے پاس بہترین سپنرز موجود ہیں۔ انہوں نے کہا کہ ہم جلدی وکٹیں لیکر اچھی شروعات کریں گے اور کوشش ہو گی کہ جنوبی افریقہ کو کم سکور تک محدود رکھیں۔ جنوبی افریقا کے کپتان ٹیمبا باووما نے اس موقع پر کہا ہے کہ عام طور پر پاکستان میں جیسی وکٹیں ہوتی ہیں یہ اس سے مختلف لگ رہی ہے، یقین سے نہیں کہہ سکتا کہ یہ کیسا برتاؤ کرے گی، ہمیں وکٹ کا جائزہ لینا ہو گا، امید ہے کہ اچھا سکور بورڈ پر لگا سکیں گے۔ جنوبی افریقا کے کپتان نے مزید کہا ہے کہ ہمیں اپنی باؤلنگ پر مکمل اعتماد ہے، ہماری مستقل مزاجی ہماری طاقت رہی ہے، ہم صرف ایک سپنر کے ساتھ کھیل رہے ہیں۔