کسانوں سے نوالہ چھین کر شہروں میں روٹی سستی کرنا مناسب نہیں: گورنر پنجاب

02-06-2025

(لاہور نیوز) گورنر پنجاب سردار سلیم حیدر خان نے کہا ہے کہ پیپلز پارٹی کسانوں، کاشتکاروں کو تنہا نہیں چھوڑ سکتی، کسانوں سے نوالہ چھین کر شہروں میں روٹی سستی کرنامناسب نہیں۔

گورنر پنجاب سردار سلیم حیدر خان سے گورنر ہاؤس لاہور میں پاکستان کسان اتحاد کے وفد نے ملاقات کی۔ دوران گفتگو گورنر پنجاب نے کہا کہ پیپلز پارٹی کے علاوہ تمام حکومتوں نے کسانوں اور کاشتکاروں کو رگڑا لگایا، پیپلز پارٹی کسانوں، کاشتکاروں کو تنہا نہیں چھوڑ سکتی،موجودہ مہنگائی میں کسانوں کا زندہ رہنا مشکل ہوگیا ہے، کسانوں سے نوالہ چھین کر شہروں میں روٹی سستی کرنامناسب نہیں۔ گورنر سردار سلیم حیدر خان نے کہا ہے کہ پاکستان پیپلز پارٹی واحد سیاسی جماعت ہے جس نے ہمیشہ کسانوں کے حقوق کے لئے آواز بلند کی، کسانوں کے مسائل کے حل کے لئے گورنر ہاؤس لاہور میں 3رکن خصوصی کمیٹی بنادی ، صدر ، وزیراعظم اور بلاول بھٹو سے ملاقات میں کسانوں کے مسائل سامنے رکھوں گا۔ سردار سلیم حیدر خان نے مزید کہا کہ پیپلزپارٹی کاشتکاروں کوتنہا نہیں چھوڑے گی تو کاشتکاروں کو بھی چاہئے کہ پیپلز پارٹی کو تنہا نہ چھوڑیں،زرعی اصلاحات سب سے پہلے شہید ذوالفقار علی بھٹو نے کیں جو کاشکاروں کے لئے بہترین اقدام تھا، کھاد اور بیج مہنگے ہونے کی وجہ سے کاشتکار پہلے ہی پسا ہوا ہے اور اوپر سے بجلی کے زائد بلوں نے کمر توڑ دی ہے۔