ایف آئی اے کی کارروائی، انسانی سمگلنگ میں ملوث اشتہاری سمیت 2 ملزمان گرفتار

02-05-2025

(لاہور نیوز) ایف آئی اے لاہور زون نے انسانی سمگلنگ میں ملوث عناصر کے خلاف گھیرا تنگ کرتے ہوئے ویزا فراڈ اور انسانی سمگلنگ میں ملوث اشتہاری سمیت 2 ملزمان کو گرفتار کر لیا۔

ترجمان ایف آئی اے نے بتایا کہ ملزمان کی شناخت زاہد مصطفیٰ اور امجد بھٹی کے نام سے ہوئی، گرفتار ملزمان سادہ لوح شہریوں سے ویزا فراڈ کرنے میں ملوث پائے گئے۔ ملزمان کو چھاپہ مار کارروائی میں لاہور اور قصور سے گرفتار کیا گیا۔ اشتہاری ملزم زاہد مصطفیٰ نے شہری کو کینیڈا میں ملازمت کا جھانسہ دے کر 39 لاکھ 90 ہزار روپے بٹورے۔ ملزم کے خلاف سال 2024 سے اینٹی ہیومن ٹریفکنگ سرکل لاہور میں مقدمہ درج تھا ۔ ملزم امجد بھٹی نے متعدد شہریوں کو بیرون ملک ملازمت کا جھانسہ دے کر لاکھوں روپے بٹورے، ملزم امجد کے قبضے سے متعدد پاکستانی پاسپورٹس برآمد کیے گئے۔ ملزم کے قبضے سے سپین کے جعلی پاسپورٹس بھی برآمد ہوئے ہیں۔ ملزم برآمد ہونے والے پاسپورٹس کے حوالے سے حکام کو مطمئن نہ کر سکا۔ ترجمان نے مزید بتایا کہ ملزمان بغیر لائسنس شہریوں سے پاسپورٹس وصول کر رہے تھے، ملزمان شہریوں کو بیرون ملک بھجوانے میں ناکام رہے، ملزمان بھاری رقوم وصول کرنے کے بعد روپوش ہوگئے تھے۔ ملزمان کو گرفتار کرکے تفتیش کا آغاز کر دیا گیا ہے۔