مذکراتی عمل سے نکل کر پی ٹی آئی نے غیر جمہوری سوچ کا مظاہرہ کیا: عرفان صدیقی

02-02-2025

(لاہور نیوز) مسلم لیگ (ن) کے رہنما و سینیٹر عرفان صدیقی نے کہا ہے کہ یک طرفہ طور پر مذاکراتی عمل سے نکل کر پی ٹی آئی نے غیر سیاسی اور غیر جمہوری سوچ کا مظاہرہ کیا ہے۔

عرفان صدیقی نے سماجی رابطے کی ویب سائٹ ’ایکس‘ پر اپنے ایک بیان میں کہا کہ تحریک انصاف نے مطالبات کے حوالے سے ایک اچھا موقع بھی ضائع کر دیا ہے۔ انہوں نے کہا کہ اپنے یک طرفہ طور پر مذاکراتی عمل سے نکل کر پی ٹی آئی  نے غیر سیاسی اور غیر جمہوری سوچ کا مظاہرہ کیا ہے، اس کی یہ گاڑی تو چھوٹ گئی ہے، اب اسے وسیع تر مذاکرات کے لئے وزیر اعظم کی تازہ پیشکش سے فائدہ اٹھانا چاہیے۔ رہنما مسلم لیگ ن کا کہنا تھا کہ پی ٹی آئی کو جان لینا چاہیے کہ سڑکیں، چوک، دھرنے اور لانگ مارچ نہ اسے پہلے کسی منزل تک لے کر گئے ہیں نہ اب لے کر جائیں گے، ہر مسئلے کا حل صرف سنجیدہ اور بامعنی مذاکرات ہی سے نکلتا ہے، پی ٹی آئی جتنی جلدی یہ بات سمجھ لے اس کے لئے اتنا ہی اچھا ہو گا۔