اے این ایف کا منشیات سمگلنگ کے خلاف کریک ڈاؤن، 9 ملزمان گرفتار

01-24-2025

(لاہور نیوز) اے این ایف نے ملک کے مختلف شہروں میں منشیات سمگلنگ کے خلاف کریک ڈاؤن کرتے ہوئے 5 کارروائیوں میں 9 ملزمان گرفتار کر لئے۔

 ترجمان اے این ایف کے مطابق کارروائیوں میں 1 کروڑ 14 لاکھ روپے سے زائد مالیت کی 146.4 کلو گرام منشیات برآمد کی گئی۔ پشین، بلوچستان کے علاقے میں ریسٹورنٹ کے قریب کار سے 71 کلو چرس برآمد، 2 ملزمان گرفتار ہوئے، پشاور میں پارک کے قریب کار میں چھپائی گئی 22.8 کلو چرس اور 8.4 کلو افیون برآمد، 4 ملزمان گرفتار کئے گئے۔ علاوہ ازیں ایم ون موٹروے اسلام آباد کے قریب ٹرک کے خفیہ خانوں سے 38.4 کلو گرام چرس برآمد، 2 ملزمان گرفتار کئے گئے، کیماڑی کراچی میں گاؤں کے قریب سے 3.4 کلو چرس برآمد جبکہ اسلام آباد کے ایف 10 مرکز میں ملزم کے قبضے سے 2.4 کلو چرس برآمد ہوئی۔ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔