لاہور: 131 سالہ پرانے عجائب گھر کو بین الاقوامی معیار کا میوزیم بنانے کا فیصلہ

01-23-2025

(لاہور نیوز) وزیر اعلیٰ مریم نواز شریف نے پنجاب اور تحریک پاکستان کی تاریخ محفوظ بنانے کیلئے تاریخی قدم اٹھا لیا، صوبائی دارالحکومت میں 131 سال قدیم عجائب گھر کو بین الاقوامی معیار کا میوزیم بنانے کا فیصلہ کر لیا گیا۔

وزیر اعلیٰ پنجاب کی ہدایت پر سینئر صوبائی وزیر مریم اورنگزیب نے لاہور میوزیم کا دورہ کیا، مریم اورنگزیب نے آرٹ گیلریز، سکیورٹی آفس، ٹکٹ گھر کیفے ٹیریا اور مختلف حصوں کا جائزہ لیا۔ قدیم ورثہ اور عمارتوں کے تحفظ کے عالمی ادارے یونیسکو کا پنجاب حکومت سے تعاون پر اتفاق، ورکنگ پلان تیار، عملدرآمد کا فوری آغاز ہو گا، یونیسکو لاہور عجائب گھر کو جدید ٹیکنالوجی اور عالمی معیار کے مطابق بنائے گا، اس کیلئے 240 ملین روپے مختص کر دیئے گئے ہیں۔ پلان میں معاونت کیلئے کامران لاشاری اور رضا علی نیر دادا سمیت شعبہ کے دیگر ممتاز ماہرین کی معاونت حاصل کرنے کا بھی فیصلہ کیا گیا ہے، تمام سٹیک ہولڈرز سے مشاورت کے لئے کمیٹی تشکیل دے دی گئی، سیکرٹری سیاحت بھی کمیٹی میں شامل ہوں گے۔ سینئر صوبائی وزیر  نے یونیسکو پلان کی سمری کابینہ کو ارسال کرنے کی ہدایت کر دی جبکہ میوزیم میں آنے والوں کی سہولت کے لئے مرکز مہمان داری قائم کی جائے۔ مریم اورنگزیب نے گندھارا اور خطاطی پر عالمی کانفرنسیں منعقد کرانے کے لئے پلان بھی طلب کر لیا، تاریخی نوادرات اور فن پاروں کو محفوظ بنانے کے لئے سسٹم کو ڈیجٹلائز کیا جائے گا۔ سینئر صوبائی وزیر  نے ہدایت کی کہ میوزیم کی عمارت میں نمی اور درجہ حرات کا خیال رکھا جائے تاکہ کسی نایاب چیز کو نقصان نہ پہنچے، اس موقع پر اجلاس کو بریفنگ دی گئی کہ 1894 میں قائم عجائب گھر میں لاہور کی ایک ہزار سال پرانی تاریخ محفوظ ہے۔