190 ملین پاؤنڈ ریفرنس: بانی سمیت اہلیہ کی اپیل کا ڈرافٹ تیار

01-23-2025

(لاہور نیوز) بانی پی ٹی آئی اور بشریٰ بی بی کے وکلاء نے 190 ملین پاؤنڈ ریفرنس پر اپیل کا ڈرافٹ تیار کر لیا، اپیل کا ڈرافٹ بانی پی ٹی آئی سے اڈیالہ جیل میں شیئر کیا گیا۔

وکیل سلمان صفدر  نے بتایا کہ بانی پی ٹی آئی اور بشریٰ بی بی کی 190 ملین پاؤنڈ ریفرنس میں اپیلیں تیار کر لی گئی ہیں، 190 ملین پاؤنڈ ریفرنس پر اپیل کا ڈرافٹ 20 صفحات پر مشتمل ہے۔ انہوں  نے کہا کہ بانی پی ٹی آئی سے اپیل کے ڈرافٹ پر مشاورت ہوئی ہے، 24 سے 48 گھنٹے میں سزا کیخلاف اپیل دائر کر دی جائے گی،  بانی پی ٹی آئی  نے برطانوی عدالت کے فیصلے اور این سی اے کی پروسیڈنگز کو بھی اپیل میں شامل کرنے کا کہا ہے۔ وکیل سلمان صفدر  نے کہا کہ ہمیں امید ہے القادر ٹرسٹ کیس بھی ایک سے دو سماعتوں میں ختم ہو جائے گا، القادر کیس کا فیصلہ ایک طرف جا رہا ہے اور ثبوت دوسری طرف جا رہے ہیں، کیس اتنا ہی کمزور ہے جتنا کہ سائفر کیس تھا۔