جی ایچ کیو حملہ کیس: استغاثہ کے مزید 4 گواہان کی شہادتیں قلمبند

01-22-2025

(لاہور نیوز) جی ایچ کیو حملہ کیس کی سماعت کے دوران استغاثہ کے مزید 4 گواہان کی شہادتیں قلمبند کر لی گئیں، عدالت نے وکیل مشعال یوسفزئی کو معطل لائسنس کے باوجود پیش ہونے پر شوکاز نوٹس جاری کر دیا۔

انسداد دہشت گردی عدالت راولپنڈی کے جج امجد علی شاہ نے جی ایچ کیو حملہ کیس کی اڈیالہ جیل میں سماعت کی، دوران سماعت بانی پی ٹی آئی کی وکیل مشعال یوسفزئی معطل شدہ لائسنس کے باوجود پیش ہوئیں جس پر پراسیکیوشن نے اعتراض اٹھا دیا، عدالت نے مشعال یوسفزئی کو شوکاز نوٹس جاری کرتے ہوئے آئندہ سماعت پر جواب طلب کر لیا ہے۔ فاضل جج نے کہا کہ مشعال یوسفزئی عدالت کو اپنے دفاع میں مطمئن نہیں کر سکیں، وہ پروفیشنل مس کنڈکٹ کی مرتکب ہوئی ہیں، وضاحت کریں کہ جعل سازی پر کیوں نہ آپ کے خلاف فوجداری کارروائی کی جائے، عدالت نے آئندہ سماعت پر مشعال یوسفزئی سے جواب طلب کر لیا ہے۔ عدالت میں دوران سماعت استغاثہ کے مزید چار گواہان کی شہادت قلم بند کی گئی، خیال رہے مقدمہ میں مجموعی طور پر 9 گواہان کی شہادتیں ریکارڈ ہو چکی ہیں، جی ایچ کیو حملہ کیس کی مزید سماعت ہفتہ 25 جنوری تک ملتوی کر دی گئی۔