بھٹوں کو زگ زیگ ٹیکنالوجی کیلئے بلاسود قرض دے رہے ہیں: مریم اورنگزیب

01-20-2025

(لاہور نیوز) سینئر صوبائی وزیر مریم اورنگزیب نے کہا ہے کہ ماحول کو آلودگی سے بچانے کی خاطر بھٹوں کو زگ زیگ ٹیکنالوجی کیلئے بلاسود قرضے دے رہے ہیں۔

پنجاب اسمبلی میں اظہار خیال کرتے ہوئے سینئر صوبائی وزیر مریم اورنگزیب نے کہا ہے کہ پنجاب کی تاریخ میں پہلی بار تمام بھٹوں کی ری میپنگ مکمل کی گئی ہے، زگ زیگ ٹیکنالوجی پر منتقل نہ ہونے والے بھٹوں کو مسمار کیا گیا۔ مریم اورنگزیب نے کہا کہ ماحولیاتی آلودگی کا باعث بننے والے بھٹوں کو جرمانے بھی کیے گئے ہیں، پہلی بار بھٹوں کو کیو آر کوڈ لگائے گئے ہیں۔ سینئر صوبائی وزیر کا کہنا تھا کہ پورے پنجاب میں 1270 بھٹے گرائے گئے ہیں، ٹوبہ ٹیک سنگھ اور ملتان میں بھٹوں کی ایک ہی اصول کے تحت میپنگ کی ہے جبکہ بھٹوں کی مختلف طریقوں سے مانیٹرنگ بھی کی جا رہی ہے۔