حکومت کو مذاکرات سے فرار کیلئے چور دروازہ چاہیے، سلمان اکرم راجہ

01-19-2025

(لاہور نیوز) پاکستان تحریک انصاف کے سیکرٹری جنرل سلمان اکرم راجہ نے کہا ہے کہ حکومت کو مذاکرات سے فرار کیلئے چور دروازہ چاہئے، اگر کمیشن نہیں بنتا تو مذاکرات آگے نہیں جائیں گے۔

دنیا نیوز کے پروگرام " ٹونائٹ ود ثمر عباس " میں گفتگو کرتے ہوئے سلمان اکرم راجہ نے کہا کہ بانی پی ٹی آئی کیخلاف اس فیصلے کی نہ کوئی بنیاد ہے نہ کوئی دلیل، اس رقم میں سے ایک پیسہ بھی بانی پی ٹی آئی کے پاس نہیں گیا۔ سلمان اکرم راجہ  نے کہا کہ انگلینڈ ویلز ہائیکورٹ کے فیصلے  نے اس فیصلے کو بے نقاب کر دیا ہے، یہ مضحکہ خیز فیصلہ ہے، پنجاب حکومت کی مجال نہیں کہ وہ القادر ٹرسٹ کو اپنی ملکیت میں لے۔ سیکرٹری جنرل پی ٹی آئی نے کہا کہ فیصلہ اور سزا دونوں کی معطلی ہو سکتی ہے، اس فیصلے کے ذریعے عوام کی آنکھوں میں دھول جھونکی جا رہی ہے، القادر ٹرسٹ بھی مفاد عامہ کا ٹرسٹ ہے، ہماری اپیل جلد لگے گی اور یہ فیصلہ دو دونوں میں اُڑ جائے گا۔