جواد احمد کی اہلیہ کے بیوٹی پارلر سے بجلی چوری پکڑی گئی،گلوکار کیخلاف مقدمہ درج

01-16-2025

(ویب ڈیسک)پاکستان کے معروف گلوکار جواد احمد کی اہلیہ کے بیوٹی پارلر سے بجلی چوری پکڑی گئی ،اس دوران لیسکو عملے سے تلامی کلامی پر گلوکار کیخلاف مقدمہ درج کروادیا گیا۔

رپورٹ کے مطابق واقعہ جوہر ٹاؤن میں گلوکار جواد احمد کی اہلیہ کے بیوٹی پارلر پر پیش آیا، جہاں لیسکو عملہ بجلی چوری کی تحقیقات کے لیے پہنچا تھا۔ لیسکو کی جانب سے تھانہ نواب ٹاؤن میں درج کروائے  گئے مقدمے  میں گلوکار جواد احمد، ان کے ساتھی عدیل اور چار نامعلوم افراد کو نامزد کیا گیا ہے۔درخواست گزار کے مطابق جواد احمد نے موقع پر پہنچ کر عملے کے ساتھ گالم گلوچ کی اور عملے کو دھمکایا۔ مزید یہ بھی الزام لگایا گیا کہ انہوں نے اپنی گاڑی (ویگو ڈالا) عملے پر چڑھانے کی کوشش کی۔  لیسکو حکام نے بتایا کہ بیوٹی پارلر کے بجلی کے  میٹر میں چھیڑ چھاڑ کی گئی تھی، جس کا مقصد بجلی چوری کرنا تھا۔ بجلی کی غیر قانونی ترسیل روکنے کے لیے پارلر کی بجلی منقطع کر دی گئی ہے۔پولیس کو درخواست موصول ہو چکی ہے اور معاملے کی تحقیقات جاری ہیں۔ لیسکو نے اعلیٰ حکام کو بجلی چوری کے شواہد اور دیگر تفصیلات فراہم کر دی ہیں۔ اس معاملے پر ابھی تک جواد احمد یا ان کے ترجمان کی جانب سے کوئی بیان جاری نہیں کیا گیا۔