عبدالرحمان پاکستان کرکٹ ٹیم کے نئے سپن باؤلنگ کوچ مقرر

01-15-2025

(لاہور نیوز) پاکستان کرکٹ بورڈ (پی سی بی) نے قومی ٹیم کے لئے سابق سپنر عبدالرحمان کی خدمات بطور سپن باؤلنگ کوچ حاصل کر لیں۔

شان مسعود کی قیادت میں ان دنوں پاکستان کرکٹ ٹیم ملتان میں موجود ہے جہاں ٹیم پاکستان آئی سی سی ٹیسٹ چیمپئن شپ کے 2 ٹیسٹ میچوں کا پہلا ٹیسٹ 17 جنوری سے شروع کرنے جا رہی ہے۔ قومی سلیکشن کمیٹی نے ویسٹ انڈیز کے خلاف 15 رکنی ٹیسٹ سکواڈ کا اعلان کر دیا ہے جس میں 3 سپنرز نعمان علی، ابرار احمد اور ساجد خان کو شامل کیا گیا ہے۔ اب پاکستان کرکٹ بورڈ نے قومی ٹیم کے لئے ٹیسٹ سپنر عبدالرحمان کی خدمات بطور سپن باؤلنگ کوچ حاصل کر لی ہیں۔ بائیں ہاتھ کے ٹیسٹ سپنر عبدالرحمان جنہوں نے پاکستان کے لئے 2006 سے 2014 تک ٹیسٹ، ون ڈے اور ٹی 20 میچز میں 140 وکٹیں حاصل کی ہیں انہوں نے ملتان میں پاکستان ٹیم کو جوائن کر لیا ہے۔ سیالکوٹ سے تعلق رکھنے والے عبدالرحمان جو اس سال یکم مارچ کو اپنی 45ویں  سالگرہ کا کیک کاٹیں گے، اس سے پہلے پاکستان خواتین ٹیم کے کوچنگ سٹاف میں شامل تھے۔ قومی ٹیم کیساتھ بحیثیت سپن باؤلنگ کوچ عبدالرحمان کا یہ پہلا تجربہ ہے، عبدالرحمان کو ٹیم کے ساتھ رکھنے کا مقصد نعمان علی، ساجد خان اور ابرار احمد سے مزید بہتر پرفارمنس لینا ہے۔