لیسکو نے لوڈشیڈنگ کا دورانیہ سات گھنٹے تک کر دیا

01-13-2025

(لاہور نیوز) لیسکو نے ہائی لائن لاسز کی بنیاد پر بجلی کی لوڈشیڈنگ کا دورانیہ چار سے بڑھا کر سات گھنٹے تک کر دیا۔

شہر کے مختلف علاقوں میں بجلی چوری کی بڑھتی شرح کا معاملہ سنگین ہو گیا۔ ذرائع کے مطابق لیسکو  نے ہائی لاسز والے علاقوں میں سات گھنٹے لوڈشیڈنگ کا شیڈول جاری کر دیا ہے، لیسکو  نے دو سے لیکر سات گھنٹے تک بجلی کی لوڈشیڈنگ شروع کر دی ہے۔  لیسکو ذرائع نے بتایا شیڈول کے مطابق کمپنی میں بیس فیصد تک لائن لاسز پر لوڈشیڈنگ نہیں کی جائیگی، تیس فیصد تک دو، چالیس فیصد تک تین سے چار گھنٹے لوڈشیڈنگ کا دورانیہ بڑھا دیا گیا ہے، اسی طرح پچاس فیصد تک پانچ، ساٹھ فیصد تک چھ جبکہ ساٹھ فیصد سے زائد لاسز ہونے پر سات گھنٹے لوڈشیڈنگ شروع کی گئی ہے۔ علاوہ ازیں اووربلنگ کیخلاف کریک ڈاؤن کے دوران لیسکو کے فیڈرز پر لائن لاسز کی نشاندہی کی گئی ہے، لائن لاسز کی شرح سامنے آنے پر لیسکو کو مزید تین گھنٹے تک لوڈشیڈنگ کا دورانیہ بڑھانا پڑا ہے۔