احد رضا میر کا دنانیر مبین کو گریجوایشن مکمل ہونے پر سرپرائز

01-07-2025

(ویب ڈیسک) پاکستان کی ابھرتی ہوئی اداکارہ دنانیر مبین اور احد رضا میر کے نئے ڈرامے ’م سے محبت‘ کے سیٹ سے ایک ویڈیو سوشل میڈیا پر وائرل ہورہی ہے۔

اپنے مشہور ڈائیلاگ ’پاوری ہو رہی ہے‘ کی ویڈیو سے شہرت کی بلندیوں پر پہنچنے والی دنانیر نے حال ہی میں اپنی گریجویشن مکمل کی ہے، دنانیر کی گریجویشن کی خوشی میں ساتھی اداکاروں نے انہیں مزاحیہ انداز میں سرپرائز دیا جس پر دنانیر قہقہے لگاتی نظر آئیں۔  دنانیر کو ان کے ساتھی اداکار احد رضا میر اور ان کے والد معروف اداکار آصف رضا میر نے تحفے دیے۔ احد رضا میر نے دنانیر کو مبارکباد دینے کے لیے نوٹوں کا ہار پہنایا جبکہ آصف رضا میر نے مٹھائی کا تحفہ پیش کیا اور انہیں گریجویشن کی مبارکباد دی۔ دنانیر سینئر اداکاروں کی جانب سے ملنے والی اس مزاحیہ انداز کی مبارکباد پر نہایت خوش اور پرجوش دکھائی دیں۔ سوشل میڈیا پر وائرل ہونے والی اس ویڈیو کو دیکھ کر صارفین پہلے تو حیرت میں مبتلا ہوئے اور سمجھے کہ احد اور دنانیر کا رشتہ طے ہونے کے باعث انہیں ہار اور مٹھائی پیش کی جارہی ہے تاہم بعد میں انہیں ویڈیو کی حقیقت معلوم ہوئی۔