یوٹیلٹی سٹورز پر 6 ماہ سے آٹے کی سپلائی بند

01-01-2025

(ویب ڈیسک) شہر کے یوٹیلٹی سٹورز پر گزشتہ 6 ماہ سے سستا آٹا فراہم نہیں کیا جا سکا، جس کے باعث انتظامیہ نے پیکنگ والا مہنگا آٹا رکھنا شروع کر دیا ہے۔

یوٹیلٹی سٹورز پر پیکنگ والے 5 کلو آٹے کا پیکٹ 680 روپے میں فروخت ہو رہا ہے جبکہ 10 کلو آٹے کا تھیلا 1360 روپے میں دستیاب ہے۔ اوپن مارکیٹ میں بھی پیکنگ والا 5 کلو آٹا 680 روپے اور 10 کلو کا تھیلا 1360 روپے میں مل رہا ہے۔ یوٹیلٹی سٹورز پر سبسڈائز 10 کلو آٹے کا تھیلا 650 روپے میں دستیاب تھا۔  دوسری طرف شہریوں نے مہنگا آٹا خریدنے سے انکار کر دیا ہے اور وفاقی حکومت سے مطالبہ کیا ہے کہ وہ یوٹیلٹی سٹورز پر سبسڈائز آٹا فراہم کرے تاکہ عوام کو ریلیف مل سکے۔