مریم نواز کا جنکو سولر کمپنی کا دورہ، گرین انرجی منصوبوں میں تعاون کی دعوت دی

12-12-2024

(لاہور نیوز) وزیراعلیٰ پنجاب کے تاریخی دورہ چین کا تیسرا روز، مریم نواز شنگھائی میں انتہائی مصروف رہیں۔

وزیراعلیٰ پنجاب مریم نواز نے جنکو سولر کمپنی کا دورہ کیا، جنکو سولر کمپنی نے پنجاب میں مینوفیکچرنگ پلانٹ لگانے کی پیشکش کردی، مریم نواز نے گرین انرجی منصوبوں میں شراکت داری کی دعوت دی، جنکو سولر کمپنی پنجاب میں چارجنگ سٹیشن بھی قائم کرے گی۔ مریم نواز نے پنجاب میں قابل تجدید اور سستی سولر انرجی کے منصوبے کے عزم کا اظہار کیا، وزیراعلیٰ نے من ہانگ ڈسٹرکٹ انڈسٹریل زون کا بھی دورہ کیا، امپورٹ کموڈیٹی، ایگزی بیشن اور ٹریڈنگ سینٹر کا معائنہ کیا، مریم نواز نے ای کامرس کے شعبے میں گہری دلچسپی کا اظہار کیا۔ وزیر اعلیٰ نے ہانگ چی آؤ امپورٹ نمائش اینڈ ٹریڈ سینٹر میں پاکستانی پویلین کا بھی دورہ کیا، پاکستانی مصنوعات کی مارکیٹنگ کرنیوالے نوجوان تاجر سے ملاقات پر اظہار مسرت کیا، مریم نواز کی کمیونسٹ پارٹی کے چائنا میوزیم آمد پر چین کی تاریخ اور انقلاب کی بصری تاریخ دکھائی گئی۔ مریم نواز نے میوزیم میں دیوار گیر میورل کے سامنے تصاویر بنوائیں، چینی قیادت کے مجسموں میں دلچسپی کا اظہار کیا، وزیراعلیٰ پنجاب کی کمیونسٹ پارٹی آف چائنہ کی شنگھائی کمیٹی کے ڈپٹی سیکرٹری سے ملاقات ہوئی، پنجاب اور شنگھائی میں معاشی تعلقات کو مزید مستحکم کرنے کے عزم کا اظہار کیا۔