سولر توانائی استعمال میں لا کر روایتی ایندھن پر انحصار کم کریں گے، مریم نواز

12-11-2024

(لاہور نیوز) پنجاب کی وزیر اعلیٰ مریم نواز نے کہا ہے کہ پنجاب میں شمسی توانائی کی پیداوار کے بہترین مواقع موجود ہیں، سولر توانائی استعمال میں لا کر روایتی ایندھن پر انحصار کم کریں گے۔

وزیر اعلیٰ پنجاب مریم نواز شریف نے شنگھائی میں جِنکو سولر کمپنی کا دورہ کیا، جہاں انہیں ٹیم سمیت جنکو کمپنی کی سولر ٹیکنالوجی اور معیاری سولر مصنوعات پر تفصیلی بریفنگ دی گئی، اس موقع پر چین اور پنجاب کے درمیان سولر ٹیکنالوجی کی منتقلی اور معلومات کے تبادلے پر زور دیا گیا۔ وزیراعلیٰ مریم نواز کی ہدایت پر حکومت پنجاب کی ٹیم سولر مینوفیکچرنگ پلانٹ کے لئے ورکنگ کرے گی ، ساتھ ہی جنکو سولر کمپنی پنجاب میں چارجنگ سٹیشن بھی قائم کرے گی، جنکو سولر کمپنی کو پنجاب میں مینوفیکچرنگ پلانٹ لگانے کی پیشکش کی گئی۔  وزیر اعلیٰ نے پنجاب میں قابلِ تجدید اور سستی سولر انرجی کے منصوبے کے عزم کا اظہار کیا، انہوں نے جنکو کمپنی کو سولر ٹیکنالوجی کے فروغ کی کوششوں کو سراہا، جِنکو سولر کو پنجاب میں گرین انرجی منصوبوں میں شراکت داری کی دعوت دی گئی۔