مری میں بارش و برف باری: سیاحوں اور انتظامیہ کو الرٹ جاری

12-08-2024

(لاہور نیوز) مری میں بارش اور برف باری کا سلسلہ جاری ہے، پی ڈی ایم اے کی جانب سے آئندہ 24 گھنٹوں تک مزید بارش و برف باری کے امکانات ظاہر کیے گئے ہیں۔

ترجمان پی ڈی ایم اے کے مطابق آئندہ 24 گھنٹوں تک مزید بارش و برف باری کے امکانات ہیں، بارش اور برف باری کے باعث سڑکوں پر ٹریفک کی روانی متاثر ہو سکتی ہے، سڑکوں پر انتظامیہ کی جانب سے نمک کا چھڑکاؤ کیا جا رہا ہے۔   ڈی جی پی ڈی ایم اے عرفان علی کاٹھیا کی جانب سے مری انتظامیہ کو الرٹ رہنے کی ہدایات کی گئی ہیں، ڈی جی کا کہنا ہے کہ انتظامیہ الرٹ رہے ، کسی قسم کی غفلت کا مظاہرہ نہ کیا جائے۔ انہوں نے کہا کہ ہیوی مشینری کے استعمال سے برف کو ساتھ ساتھ ہٹایا جائے، شاہراہوں پر ٹریفک کی روانی کو یقینی بنایا جائے، سیاحوں کو موسم کی مناسبت سے سہولیات فراہم کرنا انتظامیہ کی ذمہ داری ہے۔ ڈی جی عرفان علی نے بتایا کہ مری میں سیاحوں کی رہنمائی کے لیے 13 فسیلیٹیشن مراکز قائم ہیں، سیاحوں سے گزارش ہے کہ موسم کی صورت حال کا جائزہ لے کر سفرپر نکلیں۔ ان کا مزید کہنا تھا کہ مری ملکہ کوہسار ہے، کوشش ہے کہ کوئی ناخوشگوار واقعہ رونما نہ ہو ، تمام ادارے عوام الناس کی خدمت میں مصروف ہیں تاہم شہری احتیاط کریں اور غیر ضروری سفر سے گریز کریں۔