ماضی کے مقبول گلوکار اور معروف نعت خواں جنید جمشید کی 8 ویں برسی

12-07-2024

(لاہور نیوز) ماضی کے مقبول گلوکار اور معروف نعت خواں جنید جمشید کی 8 ویں برسی آج منائی جا رہی ہے۔

پاکستان کے نامور پاپ سنگر اور نعت خواں جنید جمشید نے 3 ستمبر 1964 کو کراچی میں آنکھ کھولی، انجینئرنگ کی ڈگری لینے کے بعد میوزک کے شعبے سے وابستہ ہو گئے، قسمت نے ابتدا میں ہی شہرت کی بلندیوں پر پہنچا دیا، وائٹل سائنز گروپ میں بطور پاپ سنگر اپنے کیریئر کا آغاز کیا، ان کا گیت دل دل پاکستان ہر زبان زد عام ہو گیا۔ سال 2004 میں جب جنید جمشید شہرت کی بلندیوں پر تھے، انہوں نے گلوکاری کو خیر باد کہہ دیا، دین اسلام کی خدمت میں مصروف ہو گئے اور تبلیغی سرگرمیوں کا باقاعدہ آغاز کر دیا، انہوں نے جتنی شہرت گلوکاری سے پائی اس سے کہیں زیادہ نعت خوانی میں اپنا مقام پیدا کیا، ان کی اپنی کہانی کی عکاسی کرتی نعت" میرا دل بدل دے " نے نوجوانوں میں خوب مقبولیت حاصل کی۔ جنید جمشید 7 دسمبر 2016 کو حویلیاں کے مقام پر فضائی حادثے کا شکار ہو کر پروردگار کے روبرو پیش ہو گئے۔