محسن نقوی کا نیشنل سٹیڈیم کراچی کا دورہ، اپ گریڈیشن پراجیکٹ کا جائزہ

12-05-2024

(ویب ڈیسک) چیئرمین پاکستان کرکٹ بورڈ محسن نقوی نے نیشنل سٹیڈیم کراچی کا تفصیلی دورہ کیا اور اپ گریڈیشن پراجیکٹ پر پیش رفت کا جائزہ لیا۔

ایف ڈبلیو او کے حکام نے اپ گریڈیشن پراجیکٹ پر ہونے والی پیش رفت کے بارے میں بریفنگ دی۔ اس موقع پر ڈائریکٹر انفراسٹرکچر پی سی بی اور منیجر نیشنل بینک کرکٹ سٹیڈیم بھی موجود تھے۔ محسن نقوی نے سٹیل سٹرکچر پر مشتمل جدید طرز کی خوبصورت ترین عمارت کے فلورز کی فنشنگ کا بھی مشاہدہ کیا اور ہدایت کی کہ رفتار کے ساتھ اعلیٰ معیار کو یقینی بنایا جائے۔ چیئرمین پی سی بی نے ہدایت کی کہ شائقین کرکٹ کی سہولت کے لیے پارکنگ ایریا کو سٹیڈیم کے قریب بنایا جائے، اور نئی بلڈنگ میں انکلوژرز بنانے کی بھی ہدایت کی۔ محسن نقوی کا کہنا تھا کہ سٹیڈیم میں نئی ایل ڈی اے لائٹس لگائی جا رہی ہیں، شائقین کرکٹ تاریخ میں پہلی بار منفرد لیزر لائٹس شو سے بھی محظوظ ہو سکیں گے۔ ان کی ہدایت پر دونوں سکور سکرینز کو اب نشستوں سے اونچائی پر نصب کیا جائے گا، محسن نقوی کا کہنا تھا کہ سکرینز اونچائی پر نصب ہونے سے شائقین کو میچ دیکھنے میں کسی قسم کی دقت کا سامنا نہیں کرنا پڑے گا۔ پی سی بی چیئرمین محسن نقوی کا کہنا تھا کہ چیمپئنز ٹرافی سے پہلے اپ گریڈیشن پراجیکٹ کی تکمیل کے لیے مزید محنت سے کام جاری رکھا جائے۔ چیمپئنز ٹرافی ٹورنامنٹ کے انعقاد کے لیے تیاریاں مکمل ہیں، پاکستان کے ساتھ بیرون ممالک سے آنے والے شائقین کرکٹ اس بار پہلے سے زیادہ سہولتوں کے ساتھ میچ دیکھیں گے۔