تجاوزات کے خاتمے کیلئے تمام تر ضروری اقدامات اٹھائے جائیں، ڈی سی لاہور

11-29-2024

(لاہور نیوز) ڈی سی لاہور سید موسیٰ رضا کا کہنا ہے تجاوزات کے خاتمے کیلئے تمام تر ضروری اقدامات اٹھائے جائیں۔

ڈی سی لاہور سید موسیٰ رضا نے تحصیل صدر کے مختلف مقامات کے دورے کئے، انہوں نے گلیوں میں صفائی کے ناقص انتظامات پر ایل ڈبلیو ایم سی ورکرز کو بہترین انتظامات کی ہدایت کر دی۔ ڈی سی لاہور سید موسیٰ رضا نے کہا اہم شاہراہوں، گلیوں، محلوں میں کوڑا کرکٹ موجود نہ ہو، شہری بھی گلی، محلوں میں کوڑا کرکٹ پھینکنے سے گریز کریں، علاقے سے تجاوزات کا خاتمہ مکمل طور پر یقینی بنایا جائے، ایل ڈبلیو ایم سی اور واسا آپس میں مکمل روابط سے علاقے میں صفائی کو بہتر بنائیں، انہوں نے برکی روڈ کے اطراف میں نالے کی صفائی ستھرائی کے واضع احکامات بھی جاری کر دیئے۔ ڈی سی لاہور  نے شہری آبادی میں جانوروں کی نشاندہی کی ہدایات کرتے ہوئے کہا جانوروں کا انخلاء کر کے متبادل جگہ فراہم کی جائے، شہر کی خوبصورتی کو مدنظر رکھتے ہوئے جانوروں اور جھگیوں کا انخلاء یقینی بنایا جائے، وزیراعلیٰ پنجاب مریم نواز شریف کی ہدایت پر کلین لاہور مشن جاری ہے۔